|
Egiazko Jainkoari deia
15
1 Baina zu, gure Jainko, ona eta leiala zara,
eroapen handikoa eta unibertsoa errukiz gobernatzen duena.  15,1 Jainkoa ona eta leiala Ir 34,6-7+. Ik. 11,23-12,2.
2 Bekatu eginda ere, zureak gara,
zure agintea aitortzen baitugu;
baina ez dugu bekatu egingo,
bai baitakigu zutartzat gauzkazula.
3 Izan ere, zu ezagutzean datza zuzentasun betea,
eta zure agintea aitortzean hilezkortasunaren sustraia. 15,3 hilezkortasuna 2,23+. Ik. 1,15.
4 Gu ez gaitu desbideratu gizakiak asmatutako arte maltzurrak,
ezta pintatzaileen alferreko lanak ere
–kolore anitzez nabarturiko irudiek–;
5 berauen ikuskizunak zentzugabearen grina pizten du,
idolo hilaren arnasa gabeko irudia irrikatzen duelarik.
6 Gaizkiaren zale eta itxaropen baliogabe horien duin dira,
bai idoloen egileak, bai miretsi eta gurtzen dituztenak ere.
Eltzegilea eta buztinezko idoloak
7 Eltzegilea buztin biguna lantzen saiatzen da
eta eguneroko premietarako ontziak moldeatzen ditu;
era berean eta buztin berberaz moldeatzen ditu,
bai erabilera garbietarako direnak,
baita kontrakoetarakoak ere:
eltzegileak erabakitzen du bakoitza zertarako den. 15,7 Eltzegilea Erm 9,21+.
8 Gero, bere lana lardaskatuz,
buztin berberaz jainko hutsal bat egiten du.
Eta egin ere, lurretik sortu berria den
eta, gutxi barru, zor duen bizia itzultzeko eskatuko diotenean,
atera zuteneko lurrera itzuliko denak egiten du. 15,8 lurrera itzuliko Has 3,19+.
9 Ez da kezkatzen hil beharraz edo bizitzaren laburraz,
baizik eta urregin eta zilarginekin lehian ari da,
brontzelarien lanak kopiatzen ditu
eta faltsifikazioak egiteaz harrotzen da.
10 Errautsa besterik ez da haren bihotza,
hautsa baino mespretxagarriagoa itxaropena
eta lokatza baino balio gutxiagokoa haren bizitza,
11 ez baitu aitortzen bera moldeatu duena,
arima eragilea jarri eta bizi-espiritua barneratu diona;
12 baizik eta bizitza jolastzat jotzen du,
munduko aldia dirua egiteko azokatzat:
«Edozertatik etekina atera beharra dago,
baita gaizkitik ere» dio.
13 Inork baino hobeto daki berak bekatu egin duela,
bai ontzi hauskorrak, bai jainkoen irudiak lurrez egitean.
Egiptoarren orotariko idolatria eta animalien gurtza
14 Jauna, zure herria zapaldu zuten etsaiak
zentzugabe dira denak,
umetxo baten arima baino errukarriagoak.
15 Jentil-herrien idolo guztiak hartu dituzte jainkotzat;
idolo horiek ezin dira baliatu,
ez begiez ikusteko,
ez sudurraz arnasa hartzeko,
ez belarriez entzuteko,
ez eskuetako atzamarrez ukitzeko,
eta oinak alferrikako dituzte ibiltzeko. 15,15 idoloen ezina Sal 115,4-7; 135,15-17. Ik. Jr 10,4-5; JrGt 1.
16 Izan ere, gizakiak egin ditu,
bizi-arnasa maileguan hartua duen gizakiak;
eta gizakiak ezin du egin
ezta bere antzeko jainkorik ere  15,16 ezta bere antzeko jainkorik ere: Gizakiak ezin die berak ere maileguan hartua duen bizi-arnasa berak egindakoei eman; are gutxiago, bere izaera gainditu eta jainkozko izaki bat sortu. .
17 Hilkorra izanik, gauza hilkorrak bakarrik
egin ditzake bere esku gaiztoez.
Gizakiak, gurtzen dituen gauzek baino gehiago balio du,
berak bizia hartu baitu; gauzek, ordea, inola ere ez.
18 Gainera, animaliarik higuingarrienak gurtzen dituzte,
beste guztiek baino sen gutxiago dutenak; 15,18 animalia higuingarriak gurtu 11,15; 12,27.
19 ez dute inolako edertasunik ere,
beste animalia batzuk bezala erakargarri bihur ditzakeenik;
Jainkoaren onespen eta bedeinkaziorik gabe gelditu dira 15,19 bedeinkaziorik gabe gelditu: Jainkoak bizidun guztiak bedeinkatu zituen kreaziokoan (ik. Has 1,20-30); gizakiak bere kultugai bihurtzen dituen animaliek Jainkoaren bedeinkazioa galdu egiten dute, saihestu egiten baitira jatorrizko beren helburutik. .
|
