|
Alferra
22
1 Harri kakaztuaren antzeko da alferra,
ematen duen nazkarengatik baztertu egiten dute denek.  22,1 alferra Es 6,6+; Koh 4,5.
2 Gorotzaren antzeko da alferra,
hura hartzen duen guztiak eskua astintzen.
Seme-alaben heziera
3 Lotsagarri da gaizki hezitako semearen aita izatea,
eta ez zoritxar txikiagoa alaba baldin bada. 22,3 gaizki hezitako semearen aita Es 17,21.
4 Alaba zuhurrak bereganatuko du senarra,
baina laidoztatua aitaren tristura da.
5 Lotsabakoa aitaren eta senarraren ahalkegarri,
eta biek mespretxatuko dute. 22,5 emazte lotsabakoa Es 12,4.
6 Garaiz kanpoko hitzaldia hiletetan soinua jotzea da;
baina zigorra eta zentzarazpena dagozkio beti jakinduriari  22,6 Eskuizkribu batzuek eransten dute: 7 Zer janik izan eta zintzo bizi diren seme-alabek gurasoen jatorri apala estaltzen dute; 8 seme-alaba mespretxatzaile, harroputz eta gaizki heziek, ordea, desohoratu egiten familiaren jatorri ona. . 22,6 zigorra eta zentzarazpena 30,1+.
Zentzagaitza da txoroa
9 Zentzugabeari irakastea apurtutako ontzi-zatiak elkartzea da,
lozorroan dagoena esnaraztea. 22,9 Zentzugabeari irakastea 21,14.
10 Zentzugabeari hitz egitea lo dagoenari egitea bezala da;
«Zertaz ari zara?», esango du azkenean.
11 Egin negar hildakoagatik, argia galdu baitu;
egin negar zentzugabeagatik, ez baitu buruargitasunik.
Negar gutxiago egin hildakoagatik, atsedena aurkitu baitu;
zentzugabearen bizitza, berriz, heriotza baino okerragoa da. 22,11 Egin negar hildakoagatik 38,16-23.
12 Hildakoagatiko doluak zazpi egun irauten du,
zentzugabe eta fedegabeari buruzkoak bizitza osoa.
13 Ez hitz egin asko burugabearekin,
ez ibili zentzugabearekin 22,13 Eskuizkribu batzuek tartekatzen dute: mespretxuz beteko baitzaitu ohartu ere egin gabe. ;
gorde harengandik, buruhausterik ez izateko,
astindutakoan zikindu ez zaitzan;
aldendu harengandik, atsedena aurkitu nahi baduzu,
haren zorakeriek gogait ez zaitzaten.
14 Zer da beruna baino astunago?
Nola deitu, «zentzugabe» ez bada? 22,14 zentzugabea astuna 21,16; Es 27,3.
15 Harea, gatza eta burdin bola
eramaten errazago dira zentzugabea baino.
16 Habeak ongi loturik daudenean,
etxea ez du lurrikarak ere botatzen;
berdin ongi hausnarturiko egitasmoan finkatutako erabakia:
ez dute zalantzan jartzen garai txarrean.
17 Gogoeta zentzuzkoan oinarrituriko erabakia
ondo leunduriko horman emandako pintura 22,17 pintura: Grekozkoak hareazko apaingarria dio; pinturaren iraunkortasuna hormaren nolakotasunari loturik dagoen bezala, hala erabakien sendotasuna ere hausnarketa egokiari. bezala da.
18 Gainetan ezarritako hesiek 22,18 Gainetan… hesiek: Honela ere itzul daiteke: Harresi gainean ipinitako harkoskoek. ezin haizeari eutsi;
burutazio zentzugabeetatik sorturiko erabaki ahulek
ezin tinko iraun edozein arriskuren aurrean.
Adiskidetasuna
19 Begia jotzen duenak malkoak isurarazten ditu,
bihotza jotzen duenak sentimenduak agerrarazten.
20 Txoriari harrika egiten dionak ihes eragiten dio,
laguna iraintzen duenak adiskidetasuna desegiten.
21 Lagunaren aurka ezpata erabili baduzu,
ez galdu itxaropenik, bada oraino konponbiderik;
22 lagunaren aurka zerbait esan baduzu,
ez kezkatu, bakeak egin litezke eta.
Baina irainak, harrokeriak, ezkutukoak azaltzeak,
azpikeriazko kolpeak:
hauek bai ihes eragiten diotela edozein laguni. 22,22 ezkutukoak azaldu 8,17; 27,16-21; 42,1; Es 11,13+. // azpikeriazko kolpeak 27,25; Dt 27,24.
23 Zeureganatu lagun hurkoaren konfiantza pobre den bitartean,
berarekin goza dezazun aberasten denean.
Izan zakizkio leial atsekabealdian,
harekin parte izan dezazun heredatzen duenean. 22,23 leial atsekabealdian Ik. 6,8-12; 12,9.
24 Suaren aurretik lurruna eta kea irteten dira labetik;
era berean, irainak izaten odolaren aurretik. 22,24 irainak odolaren aurretik 27,15; 28,11.
25 Ez naiz laguna babesteaz lotsatzen,
ez naiz harengandik ezkutatzen; 22,25 lagunarengandik ezkutatu 6,12.
26 baina, berarengatik zerbait txarrik gertatzen bazait,
jakingo dutenak aldendu egingo dira harengandik.
Otoitza
27 Nork ezarriko du jagolea nire ahoan
eta zuhurtasunezko zigilua ezpainetan,
ez nazaten neure hitzek eroraraz
eta mihiak galbidean jar? 22,27 jagolea ahoan 28,25; Sal 141,3.
|
