|
Ametsek baliorik ez
34
1 Itxaropen hutsal eta gezurrezkoak
zentzugabeari dagozkio;
ametsak hegoak ematen dizkio burugabeari.
2 Itzalari heldu eta haizea harrapatu nahi izatea bezala da
ametsetan oinarritzea.
3 Isla hutsa da ametsetan ikusten dena:
benetako aurpegiaren aurrean, aurpegiaren irudia.
4 Zer garbitasun atera daiteke zikinetik?
Zer egia gezurretik?  34,4 Zer garbitasun zikinetik? Jb 14,4.
5 Aztikeriak, igarpenak eta ametsak funsgabeak dira,
erdiminetan dagoen emakumearen irudipenak bezalakoak. 34,5 Aztikeriak eta ametsak funsgabeak Jr 27,9; 29,8-9; Za 10,2; Koh 5,6.
6 Ez badizkizu Goi-goikoak bidaltzen,
ez egin inolako jaramonik; 34,6 Goi-goikoak bidali Has 20,3+; Dn 2; 4; 2 M 15,11.
7 asko dira ametsek desbideratuak,
erori egin dira horietan itxaropena zutenak.
8 Legea bete-betea da, aipaturiko engainurik gabea  34,8 Legea… gabea: Honela ere itzul daiteke: Legea engainurik gabe bete behar da. ,
eta zintzoaren ahoko jakinduria bikain-bikaina.
Bidaiak
9 Asko ibiliak asko jakiten du,
eskarmentua duenak jakinaren gainean hitz egiten. 34,9 Bidaiak 39,4; 43,24-25; 51,13.
10 Probarik pasatu ez duenak gutxi daki,
11 bidaiatzen ibiliak baliabide asko du.
12 Asko ikusia naiz neure bidaietan,
eta ikasi dudana esan dezakedana baino gehiago da.
13 Sarritan egon naiz heriotza-arriskuan
eta neure eskarmentuari esker atera naiz onik.
Jaunarenganako begirunea
14 Jaunari begirune diotenak biziko dira, 34,14 Jaunarenganako begirune 1,11+.
15 salba ditzakeenagan baitute beren itxaropena. 34,15 Jauna itxaropen 2,6+.
16 Jaunari begirune diona ez da ezeren beldur,
ez da inoiz kikiltzen, hura baitu itxaropen.
17 Zorionekoa Jaunari begirune diona!
18 Norengan oinarritzen da? Nor du euskarri?
19 Maite dutenengan ditu Jaunak jarrita begiak;
bera da babesle ahaltsu, euskarri sendo,
sargorian gordeleku, eguerdiko eguzki-galdatan gerizpe,
estropezu egiten duenaren zaintzaile,
erortzen denaren laguntzaile. 34,19 Maite dutenengan Jaunak begiak 15,19+; Sal 33,18.
20 Hark jasotzen du bihotza eta argitzen begiak,
osasuna, bizia eta bedeinkazioa ematen. 34,20 Jaunak osasuna eman 1,18; 38,2.
Benetako kultua
21 Bidegabekeriaz lortutakoa sakrifiziotzat eskaintzen duenak
opari gaitzesgarria egiten du; 34,21 Gaiztoen (bidegabekeriazko) sakrifizioak Es 15,8+. Ik. 35,1. // opari gaitzesgarria Lb 22,20-21.
22 legea hausten dutenen dohainak ez ditu Jaunak onartzen.
23 Goi-goikoak ez ditu hartzen atseginez fedegabeen opariak,
ezta barkatzen ere bekatuak sakrifizioen ugaritasunagatik.
24 Aitaren aurrean semea hiltzea da
behartsuen ondasunetatik sakrifizioa eskaintzea.
25 Eskean hartutako ogiaz bizi dira behartsuak,
hori kentzen diena hiltzaile da.
26 Lagun hurkoa hiltzen du mantenua kentzen dionak,
27 langileari bere soldata ukatzen dionak
haren odola isurtzen. 34,27 langileari soldata ukatu Lb 19,13+.
28 Batak eraiki, besteak desegin:
zer irabazten dute nekea baizik?
29 Batak otoitz egin, besteak madarikatu:
zeini entzungo dio Jaunak?
30 Gorpua ukitzeagatik garbikuntza egin
eta berriz ukitzen duenak,
zertarako du garbikuntza-bainu hori? 34,30 Gorpua ukitu Zen 19,11-13.
31 Berdin bere bekatuengatik barau egin
eta berriro gauza berberak egiten dituena:
nork egingo dio jaramon horren otoitzari?
Zertarako balio dio bere burua apaltzeak?
|
